風水大師 蘇民峰

我係東邪！

撰文、編輯：周文

攝影：張峻

圖片：《壹本便利》

出處：《壹本便利》第602期 "邊個夠我英"

亞視晚晚播《射鵰英雄傳》，上星期，我最喜愛的桃花島主黃藥師出場了！

黃藥師武功高強，琴棋書畫、奇門術數無一不精，連生個女黃蓉都聰明過人，別人稱他「東邪」，是由於他反對迂腐傳統，離經叛道。

在風水界享負盛名的蘇民峰亦自比東邪：「我同佢一樣，都係咁高傲。」

論風水術數，蘇民峰絕對有資格做東邪，講到「高傲」（即「寸」），相信更難搵到第二個風水師與他匹敵。

「我96、97年已經發明『寒熱命』理論，出埋書，教晒所有人，但係始終有啲人就係唔肯接受，成日話以前啲嘢最好。人係進步吖嘛，啲嘢梗係愈嚟愈好架啦！與其話佢哋個腦僵硬，不如話佢哋蠢，冇得救！」

「有啲睇相師傅，我廿年前喺廟街擺檔見到佢，到今時今日我咁多人識，佢都重喺度擺檔，我行過佢重嗌我幫襯，你話呢啲人係咪冇用？完全唔進步，同社會脫節……連我都唔識，係咪脫節先？」蘇民峰自覺與東邪一樣聰明，不會被傳統約束，勇於批評傳統風水學說，另闢蹊徑。

蘇民峰18歲離家出走，中四輟學，做過跟車、碼頭苦力、工廠雜工、茄喱啡、洗頭仔，捱盡鹹苦；今日年賺300萬，一次過付款500萬買的別墅又快將入伙，開完法拉利，又打算買部至少值300萬的開篷Bentley，白手興家，他絕對「高傲」得起。

圖:蘇民峰的辦公桌以前是清朝大夫（醫生）診症時用，由同一塊木所造，有晒出世紙，可以拎去當古董拍賣。他覺得做風水師就如做醫生一樣：「醫生用藥救人，我就用風水。」

一生任我行

蘇民峰位於佐敦的辦公室，內裏 都是明式家具，他坐在一張古董木桌後，記者甫坐下，發覺自己突然矮了下去。

「係咪風水局嚟？」我問。

「梗唔係啦，你估樣樣都講風水咩，其實做我哋呢行反而最唔講風水，因為好多嘢已經命中註定咗……」

但坐在那張「矮椅」上，我始終覺得自己低人一等，再配合四周的古式陳設，蘇民峰高高在上，像個皇帝，我就變成庶民。

「係呀，我由細到大乜都係話事，乜都惡晒，係做領導的，永遠唔聽人講，只有聽自己話！」蘇民峰說得理直氣壯。

「以前我上美術堂要畫龍船，個個同學都係打橫畫一隻船，我就畫埋上下都有船，係立體的。個腦擺出嚟唔同，天生係唔正常的腦。」蘇民峰自言，由細到大都不甘做一個平凡人：「我最鍾意着黑白色衫，但兩、三年前曾流行黑白配搭，通街都着黑白衫，我咪改着七彩衫囉，我最唔鍾意同人哋一樣！」

蘇民峰十幾歲時便同自己講：「我30歲一定要有錢，冇錢我就會自殺！」結果踏正30歲他便賺取了第一個100萬，至今已年賺300萬。「有傳媒介紹的確令我多咗生意，不過其實喺傳媒報道之前，我已經喺行內好出名。」原來蘇民峰83年入行，到90年已經成為風水界的「幕後大老細」！

圖:蘇民峰自認貪玩，曾多次參與做茄喱啡，拍過許冠傑的電影扮病人，近年又客串過《嫁個有錢人》和《行運超人》。

武功高強

「我算命好快，5分鐘我就可以知道你的一生。其他風水師接到生意，就攞嚟俾我幫手算命，我做咗佢哋的『幕後大老細』，成為算命批發，我可以邊睇電視、聽收音機，邊算命，一個月批100至200個。當時我不斷練習，除咗令我速度快之餘，重多咗好多實際例子俾我接觸，我發明『寒熱命』理論，就係因為喺批命過程中發現到好多喺八字上有關連的現象。」

訪問途中，電話不時響起，都是客人或傳媒問他風水問題。蘇民峰是行內罕有為客人提供一年免費售後服務，表面看似蝕底，但其實得着的又是他。「我進步的主要原因係不斷為你哋解決問題！客人所提的問題永遠千變萬化，我諗辦法解決的同時，自己亦可以學到、啓發到好多嘢。好似我97年發明咗個『生仔局』，係因為有個潮州人個老婆冇仔生，你知潮州人冇仔生幾大鑊架啦，醫生又話冇問題，於是搵我求救，我就諗 咗個催生仔的風水局俾佢試，結果生咗孖胎，第二個客試過又得，再不斷修改，跟住就發明呢個生仔局。」生仔局與傳統風水不同之處，是既簡單，又人人可用。

92至97年最多藝人找蘇民峰算命，最經典是93年，王菲的經理人將王菲的八字給蘇民峰算命，蘇在不知道八字屬誰人的情況下，準確批出王菲99年會結婚，然後又很快離婚，自此有「王菲御用風水師」之稱。蘇名氣大增，找他算命都要排期，02年高峰期更要排9個月！

命犯天煞孤星

42歲的蘇民峰曾為自己批命，結果是「冇朋友，冇親人」，十足十《中華英雄》內華英雄般命犯天煞孤星，無伴終老，孤獨一生。

事實上，一講到家人，蘇民峰即說：「冇架！」

父母對他來說，沒有特殊意義，就連農曆新年也沒回家吃飯。「我30歲前都未返過屋企，佢哋又唔會搵我，當生少個囉。依家咪俾啲錢，得閒食下飯，盡下責任囉，唔算係親情。」

蘇民峰原名蘇民立，幼時家住九龍城寨，父母做批發生意，他每朝早便坐第一班巴士送到街邊大排檔、食肆。他的四個哥哥和三個姊姊讀書成績都不好，蘇民峰亦只有中文和數學成績特別標青。「我中學讀德仁，英文最差，連問題都睇唔明，結果讀到中四留班就決定唔讀，17歲出嚟搵嘢做。」當時大他10年的二哥開表廠，全家人都要幫手打工，但蘇民峰卻唔肯幫手。「我都話我的性格係要話事，點可能幫你喺工廠打工？屋企見我唔幫手咪反面囉，跟住我咪搬咗出嚟自己住囉，家人對我冇晒期望！總之逢係講親童年我都係唔開心啦。」難怪蘇民峰與女朋友Lilian拍了12年拖也不結婚生仔了。

亦因為蘇民峰愛話事的性格，令他的朋友一個一個地離開。「我18歲開始冇朋友，以前啲同學都冇個friend，我的性格係要做領導，邊有男人頂得順？佢哋一group人咁排擠我，習慣晒啦！」蘇民峰說幸好他一生有女人運，一直都有美相伴，雖然不能代替友誼，但亦足解寂寥。他說自己55至80歲會行尾運，至少重有30年玩，若冇朋友又冇女，一定悶死。

圖:蘇民峰一向不儲蓄，前年便一擲500萬，買下深井一層4,000呎村屋。他說：「我一年搵300萬（跟手在抽屜拿了張稅單出來），俾我使240萬，我使錢好快，不過係我搵錢速度重快啫。」

成功=黃蓉+郭靖

蘇民峰聰明像黃蓉，卻有郭靖般的勤奮，他表示成功的要訣，就是要勤力和專心。他為了學好風水，十年來就只看風水書，由《麻衣》、《柳莊》至現代命理全不放過。

「當年我離家出走，完全冇生活費，我四個阿哥出外工作十年八年，竟然連一毫子都冇俾我！」為了生活，蘇民峰做過跟車、碼頭苦力、工廠雜工、茄喱啡，十分捱得。

蘇民峰的另一優點，就是勇於嘗試，爭取機會。「80年我學整頭髮，我睇報紙見『NewWorldHotel』髮廊請人，當時呢高級髮廊全部係鬼佬，我係旺角出身，着住件『夢特嬌』T恤，英文又唔識，人哋15歲做學徒，我已經19歲，但係都夠膽推門入去見工，唔識填張英文form，就叫個reception小姐幫我填，結果第二朝撞間髮廊發生罷工，我咪有得開工囉，重有機會日日學好啲英文添。如果我唔夠膽推嗰度門，咪連工都冇得做囉。」

要做天下第一

蘇民峰第一日做洗頭就立志要做師傅！「當時啲鬼佬髮廊每個禮拜會有一日modelnight，咁啱我個師傅好好人，願意教我，我咪學足五日，人哋搵model淨係識搵朋友，所以好難搵，我就夠膽周圍搵人做model，日日去樓下間『美味滋快餐店』搵啲廚師、收銀俾我剪頭髮，結果我用咗11個月就升做師傅。」

蘇民峰做了6年髮型師，由於當時做髮型的大師全由鬼佬壟斷，他覺得毫無前景，索性轉行，跟朋友合作入口龍蝦，結果蝕了十幾萬元，後來去了西藏流浪半年，回港後開了「石頭店」售賣西藏飾物，賺了點錢。由於他自小已隨祖父學風水，於是便嘗試在店內幫人睇相，後來生意好，便做全職相士至今。

「88年做理髮師嗰陣，已跟我 的風水啓蒙老師吳晚軒先生到廟街擺檔睇相，除咗賺錢，最大目的係去實習。以前學風水，每日收工就坐火車去上水師傅屋企學嘢，夜晚十一點四十分坐尾班車返屋企，都好辛苦架！人係不斷進步的，唔通一世踎喺廟街咩？」

「就算我算自己條命唔準，明日瓜得，我都冇咩遺憾。」蘇民峰說。「我有幾百個學生，啲嘢已經唔會失傳，推出咁多新方法，其實都係想抬高呢行的水準，批命準啲，就唔會俾人話係神棍。」

後記：《阿甘正傳》

湯漢斯主演的《阿甘正傳》有一句經典對白：「人生就像一盒朱古力，你未試過便不知甜還是苦。」

蘇民峰早已為自己的人生占卜，預料到45歲要退休，又計劃好將來要多做善事。人生的朱古力未嘗已經知道是甚麼味，豈不是變得毫無驚喜？

蘇民峰答：「即使係食過朱古力你都會再買第二次，但都係咁味，唔通會變咗味咩？我依家年年去兩次米蘭買衫，你去過米蘭就知嗰度其實嚟嚟去去係得嗰兩條街行；下個月我又去布吉戇 戇居居曬太陽，對我嚟講，人生就係為咗享受過程。

今年喜慶位在西北方,是擺放9朵紅玖瑰和4枝绿盆栽，催旺紅事如結婚添丁

"喺風水學嚟講，就冇話想生仔就咁擺乜，想生女就咁放啲乜！我教嘅「旺人丁」風水布局係主要旺身體機能，身體好，自然受孕嘅機會亦會大啲啦！擺嘅方法好簡單：用一張白卡托底，卡上放8粒白色石頭，做兩份，放喺家中東北方及西南方，咁就得嘞！而呢個旺人丁局，亦可加旺人緣，啱一啲經常流失員工嘅公司用，之不過有得梗係有失，有某間公司放咗呢個局後，女職員相繼大肚，一個放完產假又到下一個，搞到啲Project進度慢晒，所以喺公司擺旺人丁局之前，真係要諗真啲！"

最後我都要提提大家，想生仔都係先揾個醫生，Check清楚係咪自己身體有毛病先啦，風水都只係能助你一把㗎咋！••

from 蘇民峰個人網站：www.masterso.com

Link: 虎年運程